«Әсіре алашшыл болып жүр»: Құлбек Ергөбек алаштанушыларды сынға алды

Жазушы, әдебиет сыншысы, Мемлекеттік сыйлықтың иегері Құлбек Ергөбек Adal Adal youtube арнасына берген сұхбатында қазіргі кездегі алаштанушы ғалымдар әсіре алашшыл болып кеткенін сынға алды.

«Әсіресе кейін шыққан жас зерттеушілер әсіреалашшыл болып жүр. Мысалы, мен Сәбит Мұқановты 1980 жылдардан бері сынай бастадым. «Құбылып соққан замана желі-ай» деген көлемді мақала жаздым. Оны «Жалын» журналы әрең дегенде жариялады. Сонда жұмыс істейтін Мереке Құлкеновтер «өзіңіз Сәбит Мұқанов музейіндесіз, өкпелейтіндер табылады ғой» деген боалтын. Мақаланың мағынасы былай еді. Сәбит Мұқанов құбылып соққан замана желіне шыдай алмады, яғни ол неше түрлі қиындықтарға түсіп адасты, алашордашыларға қарсы шықты, Сәкен, Бейімбет ұсталғанда да қаралаушы мемлекеттік аппараттың жағында қалды деген ойлар жазылды. Бүгінде менің осындай мақалам далбаса болып қалды. Ал «Алаш» айқайлап жүрген Сұлтанхан, Елдос деген балаларым, інілерім Сәкен, Бейімбет, Ілияс ұсталғанда Сәбит Мұхановтар қызыл туды желбіретіп, Медеу жаққа барып арақ ішіпті деп жүр. Соларға айтар едім, бұған дейін Сәбит Мұқановты ақтаған шығармаларды оқымай-ақ қойыңдар, ең болмаса Сәбит Мұқановты, Әбділдә Тәжібаевты сынаған қазақ ғалымдарының, мына біздің еңбегімізді оқып шығыңдар», - деді жазушы-ғалым.

Оның айтуынша, Сәбит Мұқанов сияқты совет қайраткерлерін сынағанда обьективтілік керек. Сынай отырып, елге сіңірген еңбектерін де жоққа шығармауды есте ұстау қажет.