Ардақ Назаров ізіме түскен жалдамалы журналистер бар деп ойлайды

Мәжіліс депутаты Ардақ Назаров Adal ADAM youtube арнасына берген сұхбатында өзін қаралау үшін жалданған журналистер тобы бар екенін айтты.

«Парламентке келгенде менің әшкиіме тиісті, қолыңды қалтаңа салып тұрасың деді, тәкаппар екен, мобилорграф ертіп жүр деді. Журналистерден қашады деді. Мен Америкада әлем чемпионаттарында жүздеген журналистің алдында сұхбат берген адаммын ғой, қаншама журналист достарым бар. Не үшін қашам?! Мәжіліс ғимаратына кірем, сұхбат берем, кәдімгідей 10 минут ашылып, күшті сөздер айтып сөйлеймін. Арасынан бір сөзді алып, айналдырып беріп жібереді. Бір емес, бірнеше рет солай болды. Талғарға барғанда да сол. 15-20 минут сөз айттым журналистерге. Өзім азамат ретінде келіп тұрмын, мені ешкім жіберген жоқ. Көңіл айтайын дедім. Әрі осы облыстың тумасы, сайланған депутаты болған соң шу болып жатқан жағдайды өз көзіммен көрейін дедім. Біраз нәрсені айтып кеттім. Соны ертеңіне айналдырып шығарып жіберді. Мобилограф ертіп алыпты, талтаңдап жүр, қолын қалтасына салып алған деген сияқты», - деді Ардақ Назаров.

Депутаттың айтуынша, өзіне жанашыр адамдар «сақ бол» ескерту жасаған.

«Менімен айналысатын бір топ бар. Мен алғаш депутат болып келген кезде естідім соны. «Ареке, байқаңыз, сіздің артыңыздан біп топ журналистер жалданды, өте сақ болыңыз, тек қана сізбен жұмыс істейтін болады» деді», - деді Ардақ Назаров.