Алмасбек Садырбай Ауыл шаруашылығы министрлігі шегірткемен қалай күресіп жатқанын айтты

«Шаңырақ» ұлттық агро-қозғалысы» РҚБ төрағасы Алмасбек Садырбай Adal ADAM youtube арнасына берген сұхбатында ауыл шаруашылығы зиянкестерімен күрес нәтижелі емес екенін жеткізді. 

«Ауыл шаруашылығы министрлігі бес жылда шегірткемен күреске жұмсалатын қаржыны 300 млн-нан 8,5 млрд теңгеге дейін көтерді. Осы қаражатқа лайықты жұмыс жүргізілсе, шегіртке мәселесі болмас еді. Былтыр 1 млн гектар жерге 3 млрд теңге бөлген. Биыл 8,5 млрд теңгеге 2 млн гектар жер игерді. Сосын олар шегірткені күресіп, жеңу үшін жұмыс істейміз демейді, олар ақшаны игеру үшін жұмыс істеп жатыр. Ал қалай игеріп жатыр? Қараңыздар, биыл Түркістанда шегірткелер той жасады. Оның ақыры имамдардың «шегіртке халал, қуырып жеңдер» дегеніне дейін ұласып кетті. Қаражатты бөлу жағынан проблема жоқ. Оның қалай жұмсалып жатқанын тексеретін ешкім жоқ, жұмысты ұйымдастырып жатқан ешкім жоқ. Бұл ауыл шаруашылығы министрінің жіберген қателігі», - деді ол.

Алмасбек Садырбайдың айтуынша, шегірткемен күрестің тиімді жолдары бар. 

«Қазір газельдің артына тайдың татағындай шлангімен бірдеңе сеуіп, шегірткемен күресіп жүр. Млрд-таған қаржымен осылай жұмыс істеп жатыр. Пәленбай жыл бойы тендердің ақшасын сорып келе жатқан бір-жар компания. Негізі, агродронмен қызмет көрсететіндерге шегірткемен күресті тапсыру керек. Сосын, осы салаға жауапты инспекцияны Ауыл шаруашылығы министрлігінің құрамынан шығару керек», - деді.