Осал топтардың еңсесін көтеруге бағытталған Үкімет көмегін барынша алып қалуға тырысатындар көп

Мұндай азаматтар шын мәнінде қоғамның непотизм мен патернализмнен арылмайынша мемлекеттің алға баспайтынын түсінгісі келмейді. Яғни елімізде шынайы мұқтаждық пен масылдықтың аражігін ажырата алмай жүргендер өте көп. 

Өкініштісі, непотизм мен патернализмге тосқауыл қою керек деген пікірді мемлекетке қарсы пайдаланып жүрген мұндай азаматтар шын мәнінде Мемлекет басшысы Қасым-Жомарт Тоқаевтың тапсырмасы бойынша әлеуметтік-демография салада көптеген дүниелер жасалып жатқанын көргісі келмейді. Әсіресе, соның ішінде соңғы кездері елімізде мықтап қолға алынып жатқан мүмкіндігі шектеулі адамдардың құқықтарын қорғау, оларға құрметпен қарау, ерекше қажеттілігі бар жандар үшін инклюзивті білім беру жүйесін дамыту мәселелеріне басымдық беріліп жатыр. Ал шектен масылдық түптің түбінде мұндай маңызы зор әлеуметтік бағдарламалардың азаюына алып келеді. Себебі, мемлекеттің бюджеті шексіз емес. 

Көптеген сарапшылар мемлекеттің қамқорлығы қо­ғам­­дағы мұқтаждық пен әлеуметтік осал топтардың есебіне қарай қарай есептелуі тиіс екенін айтады. Рас, кез келген мемлекеттің өз халқы алдындағы міндеттемелері мен қолдау бағдарламалары болуы тиіс. Соның ішінде аз қамтылған отбасылар үшін мүмкіндігінше тегін білім, тегін медицина, әр түрлі әлеуметтік көмек көрсетуі тиіс.

Күтпеген жерден туындаған дағдарыс уақытында жекелеген азаматтар жұмыс­сыз қалып жататыны жасырын емес. Сол секілді сапалы медицина, білім алу және әлеуметтік қорғау сияқты негізгі қызметтер мен ресурстарға қолжетімділігін қамтамасыз ету мақсатында белгілі бір тәуекелдерге баруы мүмкін. 

Бірақ бұл халық арасында белгілі деңгейде патернализм тудырмауы тиіс. Өкінішке қарай, бізде осал топтардың еңсесін көтеруге бағытталған Үкіметтің азды-көпті көмегін барынша алып қалуға тырысатындар азаймай тұр. Бұл әрине, асқынған патерналистік пиғыл деген сөз. 

Бұдан шығу үшін сарапшылар қоғам назарына халқымыздың «балық берме, қармақ бер» деген аталы сөзін сіңірген дұрыс дегенді айтады. Яғни қоғамның белгілі бір тобын масылдыққа жетелеп отырған әлеуметтік көмек түрін азайтып, керісінше халықты өз бетінше еңбек етуге жетелейтін жобаларға көбірек көңіл бөлу керек.