Алматыда «Халық қатысатын бюджет» жобасы бойынша аулаларды жаңғырту жалғасуда

Мәметова көшесі, 29/41 бойынша аула аумағын абаттандыру жобасын тұрғындардың өздері әзірледі, сондықтан аға және кіші ұрпақтың барлық пікірлері мен тілектері ескерілді. Қауіпсіздік, тұрақтылық, жайлылық сияқты критерийлерге ерекше назар аударылды. 

«Біз халық игілігі үшін бюджеттің қаражатын ұтымды әрі есепті пайдалану мақсатында, адал жұмыс істеуіміз керек. Бүгінгі біздің көріп отырған нысанымыз халық игілігі үшін тек жақсылыққа жарайды деп сенеміз. Өйткені біз үшін тұрғындардың қауіпсіздігі, тұрақтылығы мен жайлылығы, тыныш өмірі мен өзін жақсы сезінуі маңызды. Біз осы жолда дұрыс жұмыс атқарып жатырмыз деп сенеміз. Ал қалған бағасын халық өзі береріне күмәнім жоқ», деді қала басшысы. 

Жас санаттары бойынша аймақтарға бөле отырып, спорттық және балалар ойын алаңдарын жаңғырту жүргізілді, спорт алаңы жаңартылды және демалыс аймағы орындықтармен жабдықталды. Айтпақшы, бұл ауланы осындай кешенді жөндеу 58 жылда алғаш рет жүргізілді.

Атқарылған жұмыстармен танысқан Алматы әкімі Ерболат Досаев мердігерлерге кепілдік міндеттемелері аясында түзетілуі тиіс кемшіліктерді атап өтті. Мегаполис әкімі қала тұрғындарының қатысуымен жайлы қалалық ортаны құруға кешенді көзқарастың маңыздылығын атап өтті. Бұл ретте, жасыл желектерді күту мақсатында мұндай жобаларда жасыл желектің сақталуын қамтамасыз ету үшін автосуару жүйелерін, воркаут-аймақтарды күн мен жауын-шашыннан қорғаған жөн. Жалпы, жаңарған аулалар тұрғындарға мүмкіндігінше ұзақ қызмет етуі тиіс.

Бұл жоба 2023 жылы берілген өтінімдер бойынша іске асырылды. Өткен жылы Алмалы ауданында аула аумақтарын абаттандыру және жөндеу бойынша ХҚБ аясында 34 жоба мақұлданды.
Ағымдағы жылы жалпы сомасы 2 млрд теңгеге 52 жобаны іске асыру жоспарлануда. Аулаларды жөндеу, қоғамдық кеңістіктерді абаттандыру және көгалдандыру, сондай-ақ иттерді серуендетуге арналған алаң жасау жоспарлануда.

Айта кетейік, Халықтың мемлекеттік қаржыны басқару мен бақылауға қатысуына бағытталған бюджеттеудің жаңа тәжірибелерін кеңінен енгізуге қатысты елімізде тиісті бастамалар іске асырылып жатыр. 

Атап айтқанда, тұрғындардың қаланы абаттандыруда жергілікті бюджет қаражатын бөлуге қатысуға мүмкіндігі бар. Осы орайда аумақты көгалдандыру, тротуарларды, пандустарды, арықтарды салу және жөндеу, ортақ пайдалану орындарын құру, жөндеу және жарықтандыру, бордюрларды, қоқыс тастайтын жерлерді жою, ортақ пайдалану орындарында күркелер, орындықтар, урналар және балалардың ойнауы және ересек тұрғындардың демалуы үшін жабдықтар мен конструкциялар орнату, балалар ойын алаңдарын орнату, жөндеу және жарықтандыру ескерілген.

Жергілікті өзін-өзі басқаруды дамыту – басым бағыттың бірі. «Халық қатысатын бюджет» орталыққа бағынатын қалалар мен облыс орталықтарына табысты енгізілді. Азаматтардың нақты сұранысына сәйкес ондаған абаттандыру жобасы жүзеге асырылды. Бұл – жақсы тәжірибе. Енді абаттандыру және тұрғын-үй коммуналдық шаруашылығының бюджетіндегі «халық қатысатын» үлесті 10 есе арттыру керек.