Қазақстан - бірлік пен тұрақтылықтың үлгісін көрсетіп отырған ел

Қазақстан – көпэтносты және көпконфессиялы мемлекет ретінде бірлік пен тұрақтылықты сақтаудың бірегей үлгісін қалыптастырған ел. Тәуелсіздік алған сәттен бастап, Қазақстан әртүрлі ұлттар мен мәдениеттердің бейбіт қатар өмір сүруін қамтамасыз етіп, қоғамдық келісімді нығайту жолында табанды еңбек етіп келеді. Бұл жетістіктің негізінде мемлекеттің ұлтжанды саясаты және Қазақстан халқы Ассамблеясы сияқты бірегей институттың қызметі жатыр.

Ассамблея – бірліктің басты құралы

Қазақстан халқы Ассамблеясы (ҚХА) 1995 жылы 1 наурызда ҚР Президенті Нұрсұлтан Назарбаевтың бастамасымен құрылды. Бұл идея алғаш рет 1992 жылы Тәуелсіздіктің бірінші жылына арналған форумда айтылған еді. Ассамблеяның басты мақсаты – елдегі этносаралық қатынастарды үйлестіру, қоғамдық келісімді қолдау және ұлттық бірлікті нығайту. Бүгінде ҚХА үш жүзден астам өкілден тұрады, олар Қазақстанда өмір сүретін барлық этностардың мүддесін білдіреді.

Ассамблея мемлекет басшысының жанындағы консультативтік-кеңесші орган ретінде қызмет етеді және этносаралық толеранттылықты дамытуға бағытталған маңызды шешімдер қабылдауға қатысады. Оның қызметі халықтардың тілін, мәдениетін және дәстүрін сақтауға, сонымен қатар мемлекеттік тілдің қолданыс аясын кеңейтуге бағытталған. Мысалы, ҚХА қолдауымен жыл сайын әр түрлі этностардың тілдерінде ондаған кітап жарық көреді, Наурыз, 1 мамыр – Қазақстан халқының бірлігі күні сияқты мерекелер дәстүрге айналды.

Қазақстанда 130-дан астам этнос өмір сүреді, олардың әрқайсысы өз мәдениеті мен дәстүрін сақтай отырып, ортақ қазақстандық сәйкестікті қалыптастыруға үлес қосады. Бұл бірліктің негізі – мемлекеттің барлық азаматтардың тең құқығын қамтамасыз ету саясаты. Конституцияда нәсілдік, ұлттық немесе діни белгілеріне қарамастан барлық азаматтардың құқықтары тең екені бекітілген.

Өзге ұлттардың бірлігі тек сөз жүзінде ғана емес, іс жүзінде де дәлелденген. Мәселен, тарихи қиын кезеңдерде, соның ішінде сталиндік қуғын-сүргін кезінде Қазақстанға жер аударылған көптеген этностар осы жерден пана тапты. Бүгінде олардың ұрпақтары қазақ халқына алғыстарын білдіріп, ортақ Отанның дамуына атсалысуда. Осы рухты бекіту үшін 1 наурыз Алғыс айту күні ретінде мерекеленеді, бұл күн этностардың бір-біріне деген құрметі мен ынтымағын нығайта түседі.

Мемлекеттің татулық пен бірлік жолындағы жұмыстары

Қазақстан мемлекеті татулық пен бірлікті сақтау үшін бірқатар маңызды шараларды жүзеге асырып келеді. Біріншіден, этносаралық қатынастарды реттеуде мемлекеттік тілдің рөлі ерекше. Қазақ тілінің мәртебесін нығайта отырып, өзге ұлттардың тілдерін дамытуға да қолдау көрсетіледі. Бұл – қоғамдық бірліктің маңызды факторы.

Екіншіден, мемлекет экстремизм мен радикализмнің алдын алуға бағытталған саясатты қолдайды. ҚХА осы бағытта мемлекеттік органдармен бірлесіп, азаматтардың саяси-құқықтық мәдениетін қалыптастыруға және қоғамда төзімділікті арттыруға күш салады.

Үшіншіден, Қазақстанның татулық пен бірлік үлгісі халықаралық деңгейде мойындалған. Бұл этносаралық толеранттылық пен қоғамдық келісім моделі БҰҰ, ЕҚЫҰ сияқты ұйымдарда жоғары бағаланып, 56 тілге аударылды. Бұл – Қазақстанның халықаралық беделінің артуына ықпал еткен маңызды жетістік.

Қазақстандағы бірлік пен тұрақтылық – мемлекеттің басты байлығы және болашақ дамуының кепілі. Қазақстан халықтары Ассамблеясы осы құндылықтарды сақтаудың және дамытудың негізгі құралы ретінде қызмет етеді. Өзге ұлттардың бірлігі мен мемлекеттің татулық жолындағы жұмыстары арқылы Қазақстан әлемге бейбітшілік пен келісімнің жарқын үлгісін көрсетуде. Бұл жолда әрбір азаматтың ортақ мақсатқа ұмтылуы – еліміздің гүлденуінің кілті.