БҚО-да «Бөкей» театрының жаңа қойылымы сахналанды

Тарих пен мәдениеттің орталығына айналған қасиетті өлке, тұңғыштар мекенінің сахнасында жергілікті «Бөкей» театры көпшілік көптен күткен жазушы Сәкен Жүнісовтың «Қысылғаннан қыз болдық» музыкалық комедиясын қалың бұқараның назарына ұсынды, деп хабарлайды Adaladam.kz.

Қоюшы режиссері ауданымыздың «Құрметті азаматы» Самал Әбуов.

Спектакльдің желісіне келер болсақ, пьесасы өткен ғасырдың сексенінші жылдарында жазылған.  Комедия қойылымы белгілі бір ауылда өтеді. Мал дәрігері Жұмат жаңа музыкалық топ құру туралы идеяларын айтып, ауыл әкімі Ыбырай Жарылкаповичтан  келісім алады. Бірақ, ансамбль тек қыздардан құрылу қажет. Қызықтың бәрі осы топты құру жолында суреттеледі.

Қойылым аяқталғаннан соң аудан әкімі Нұрлыбек Даумов сөз алып, көрерменді театр мерекесімен құттықтап, - Ұлы жазушыларымыз театрды – тәрбие мектебі, тәлім мен рухани азық алар өнердің ордасына балаған. Театрдан әрбір жан өзіне керек дүниені таба алатыны сөзсіз: онда өмір шындығы да, әзіл де, қайғы-мұң да, ән мен би де, жан тыныштығы да бар. Таңдаулы өнерпаздардың актерлік шеберлігі арқылы образдарды ашып көрсетуі, ең маңызды әрі жауапты іс.

Саңлақ жазушы Сәкен Жүнісовтың пьесасының негізінде сахналанған «Қысылғаннан қыз болдық...» атты комедияның Бөкей елінде қойылуына қол ұшын беріп, «елге» деп аянбай атсалысып, еңбек етіп жүрген, спектакльдің қоюшы режиссері, ауданымыздың «Құрметті азаматы» Самал Қадерұлына алғысымды білдіремін. Кәсіби тұрғыда білімдері болмаса да біздің жігіттеріміз бен қыздарымызды жаңа қырынан ашып, актерлік шеберліктерін дамытып, жастарымызға жаңа дем мен леп беріп, қойылымның сәтті шығуына себепкер болып отырсыз. Әрине, бұл тұрғыда театр әртістерінің ерен еңбегі мен таудай талпынысын айтпай кету қателік болар. Тұлғалардың рөлін ашу ең біріншіден үлкен жауапкершілік. Олардың сөйлеу мәнерін, жүріс-тұрысын нақтылап, әбден зерттеп-зерделеп, өзі сомдаған образды айнытпай шынайы алып шығулары талант пен тапқырлықты талап етеді. Көрерменнің ыстық ықыласы мен ізгі ниетіне қарағанда біздің өнерлі қыз-жігіттер өнер сүйер қауымның көңілінен шықты деп есептеймін, - деген жылы тілегін білдіріп, аудан тұрғындары атынан Самал Әбуовқа «Алғыс хат» табыс етті.

Бір сағаттан астам уақытқа созылған шытырман күлкілі оқиғаларға толы комедия көзі қарақты бөкейлік көрерменнің көңіл-күйін көтеріп, ерекше ықыласқа бөленді.

 Қойылым 27 ақпан күні де бөкейлік көрерменнің назарына ұсынылды.