Ассамблея өкілдері Маңғыстауда «Бірлік түбі береке» атты мерекелік шара өткізді

Бұл мереке бүгінде тек қазақ халқы ғана емес, Қазақстанда тұратын барлық ұлттардың асыға күтетін мерекесіне айналып отыр деуге болады. Сонымен қатар әз-Наурыз татулық пен бірліктің, молшылықтың, берекенің белгісі саналады. 

Осы Әз-Наурыз мейрамы қарсаңында Қазақстан халқы Ассамблеясының Маңғыстау филиалы айрықша шара өткізді. Жылдың басы, берекенің бастауы Наурыз мейрамының келу құрметіне деп Амфитеатр алаңында «Бірлік түбі береке» атты мерекелік шара ұйымдастырылды.

«Наурыздың басты атрибуты  - татулық, жылулық екені белгілі. Сондықтан да болар әз-Наурыз мейрамы батыс өңірде ерекше аталып өтеді. Адамға жалпы табиғатқа жаңару әкеліп, шуақ сыйлайтын мерекелердің бірі. Әрі бұл мереке ұлттық мәдениетімізді одан сайын жаңғырта түсетін атақты мерекелер санатына жатады. Бұл мерекеде қазақ халқы барын көрсетіп, ерекше пейілін паш етеді. Сол секілді еңң жақсы киімдерін киіп, ағайын-туыс, көрші-қолаңмен толықтай көрісіп шығады. Бұл мереке сонымен қатар Қазақстанда тұратын барлық этностардың  ортақ тарихымыз бен салт-дәстүріміздің жаңаруына үлесін қосып отыр», - дейді ұйымдастырушар. 

Шара барысында дәстүрлі спорт түрлерінен әр түрлі жарыстар ұйымдастырып, әннен, биден шашу шашылды. Орталық алаңда «Достық үйі» деп аталатын киіз үйлер тігіліп, Наурыз көже таратылды. Бауырсақ, шұбат сынды тағамдар насихатталып, қазақ халқының  және шығыс халықтарының ұлттық киімдері мен әшекей бұйымдары жұрт назарына ұсынылды. Мерекелік шараға қатысушы қала тұрғындары мен қонақтарына 500 орындық «Балалар себеті» дайындалып, таратылды.

«Бірлік түбі береке» деген атаумен өткен мереке қала жұртына жақсы көңіл-күй сыйлады. Әсіресе келушілер татар этномәдени бірлестігінің «Каспий толқыны» ансамблі мен украин этномәдени бірлестігінің құрамындағы «Смеричка» ансамблінің өнеріне тәнті болғандарын айтып жатты. Шара соңында армян этномәдени бірлестігінің мүшесі, «Бала дауысы» байқауының бас жүлдесінің иегері Армен Сахакян әннен шашу шашып, көременнің құлақ құрышын қандырды. 

Айтпақшы, мұндай шаралар еліміздің өзге де өңірлерінде өткізіліп жатқанын айта кету керек. 
Ұлыстың ұлы күні қарсаңында Алматыда да әз-Наурыз мерекесіне орай қайырымдылық шарасы өтті. Бұл шараға Республикалық Достық үйінің Алматы қаласындағы филиалы мен «ATA Yord-NOMAD» әзірбайжандар этномәдени бірлестігі мұрындық болып отыр. Сонымен қатар, көрерменге қуаныш сыйлаған бұл шараға «Қазақстан ұйғырларының республикалық этномәдени орталығы» қоғамдық бірлестігі және «Барбанг» Қазақстан күрдтері қауымдастығы ат салысқанын айта кету керек. 

Шараға орай әлеуметтік көмекке мұқтаж балаларды қолдау жөніндегі облыстық орталықта қайырымдылық акциясы өтті. Шара барысында Қазақстан күрдтерінің Барбанг қауымдастығы төрағасының орынбасары Рафик Мирзоев кішкентай баланың тұсауын кесіп, арнайы сый жасады.