Ауыз суға жарымай отырған елді-мекендер саны азайып келеді

Аталмыш салаға бөлінетін қаржы да көбейіп, мемлекет тарапынан ауылға жалпы ауыл шаруашылығын қолдау бағдарламалары да қарқын алып келеді. Бұл өз кезегінде ұзақ жылдар бойы шешімін таппай келе жатқан ауыз су мәселесіне де оң әсер етіп отыр. Яғни жыл өткен сайын сапалы ауыз суға жарымай отырған  елді-мекендер саны да біртіндеп азайып келеді. 

Жақында Жетісу облысы, Алакөл ауданына қарасты Бибақан ауылының тұрғындары қоңыр күзді қуанышты жаңалықпен қарсы алды. Нақты айтар болсақ, жүз елуден тұрғыны бар Бибақан ауылы ауыз суға қосылды. Тұрғындардың айтуынша, ауылда бұған дейін орталықтандырылған су құбыры болмаған. 

«Аулаға орнатқан су сорғыштан су алатынбыз. Сондай-ақ бақшаны суару қажет болды, сондықтан су әрқашан жеткіліксіз болды. Суды үнемі үнемдеуге тура келді, әсіресе жазда. Қазір ауылымызға су тартылды. Су таза және жұмсақ. Қысым да жақсы. Адамдарға қажетті жағдай жасап, халықтың қамын ойлайтыны қандай жақсы, өйткені ауыз су бәрінен де маңызды», - дейді ауыл тұрғыны Қапиза Хамитова.

Айта кетерлігі, алақандай ғана ауылға су тарту жұмыстары «Ауыл аманаты» жобасы аясында іске асырылып отыр. Орталықтандырылған су құбырын тартуға ел қазынасынан 245 миллион теңге бөлініпті. Су тарту жұмыстары өткен жылы басталған. Айналасы бір жылдың ішінде екі ұңғыма қазылып, ұзындығы  алты шақырым су құбыры желісі тартылған. 

Ауылға құбыр желісінің тартылуы өрт сөндіру ісіне де әсер еткен. Мамандар көлемі 18 текше метр болатын алты өрт сөндіру цистернасын орнатып берген. Әрине бұл да ауыл тұрғындарына үлкен қуаныш сыйлаған.

Алакөл ауданы құрамына 56 елді мекен кіретін әкімшілік аумақ болып есептеледі. Бүгінде осындай жүйелі жұмыстардың арқасында 47 ауылға орталықтандырылған су жүйесі тартылған. Қазіргі таңда тағы ьөрт ауылға су тарту жұмыстары жүргізіліп жатыр. Жұмыстар жыл соңына дейін аяқталады деп күтілуде.