Тамара Дүйсенова өңірлердегі «Ауыл аманаты» бағдарламасының қатысушыларымен кездесті

Алдымен Түркістан өңіріне табан тіреген Дүйсенова ханым ауылдық округ әкімдерімен өткен жиында ауыл тұрғындарының әл-ауқатын жақсарту шараларын талқылады.

Премьер-министрдің орынбасары кездесу барысында Мемлекет басшысы  Қасым-Жомарт Тоқаевтың Қазақстан халқына жолдауында  «Ауыл аманаты» жобасына ерекше тоқталып,  ел дамуына үлес қосам деген кез-келген адамға қолдау көрсетуге тапсырма бергенін атап өтті. Өңір басшысы Дархан Сатыбалдының айтуынша, сандық отбасы картасының деректері негізінде Мемлекет қолдауына ие болатын әл-ауқаттың 5 санаты анықталған. Сондай-ақ ол Дағдарыс және төтенше жағдайлар санаттарымен жұмыс істеу мақсатында мемлекеттік қолдаудың ең оңтайлы шараларын қолдану қажет екенін,  «Бір ауыл – бір өнім» тәсілін енгізу жоспары бар екенін айтты. Айтуынша, бұл жергілікті шикізаттан жоғары пайда әкелетін өнім өндіруге жол ашады. Вице-премьер бұл бастамаға оң баға берді.

Тамара Дүйсенова Ақтөбе облысына барған сапарында да тек облыспен шектеліп қалмай аудан, ауыл әкімдерімен кездесті. Кездесу барысында жергілікті тауар өндірушілерді қолдау мәселесіне де арнайы тоқталды.

Кездесуде жергілікті тұрғындар «Ауыл Аманаты» яғни ауыл тұрғындарының табысын арттыру жобасының жүзеге асырылу нәтижелерінің көңілінен шығып отырғанын атап өтті. Жоба аясында ауыл тұрғындары өз ісін ашу үшін жеңілдетілген шағын несие алып жатқаны, сондай-ақ кәсіп ашқысы келетіндерге мемлекет тарапынан қайтарымсыз гранттар қарастырылғанына ризашылықтарын білдірді.

Мәселен, Қобды ауданының тұрғыны Разия Ғалиева «Ауыл аманаты» бағдарламасы бойынша 8,5 миллион теңге несие алып, студия ашқан. Мемлекеттік қолдау аясында бөлінген қаражатқа ол киім өндірісінің мүмкіндіктерін кеңейткен станок сатып алды. Қазір оның студиясында 16 адам жұмыс істеп, жалақы алып отыр.

Вице-премьер жобаның басқа да қатысушыларымен кездесу барыснда ауыл тұрғындарының табысын арттыру бағдарламасы аясында тұрғындардың түрлі салада кәсіп ашуына мүмкіндік беріп отырғанына көз жеткізді.